ଭୁବନେଶ୍ବର: ଓଡ଼ିଶା ଶିକ୍ଷକ ଯୋଗ୍ୟତା ପରୀକ୍ଷା (OTET) ର ତାରିଖ ପୁଣି ଥରେ ପରିବର୍ତ୍ତନ ହୋଇଛି। ଆସନ୍ତା ଜୁନ ୨୮ ତାରିଖରେ ହେବାକୁ ଥିବା ଏହି ପରୀକ୍ଷାକୁ ମାଧ୍ୟମିକ ଶିକ୍ଷା ପରିଷଦ (BSE) ଜୁଲାଇ ୫ ତାରିଖକୁ ଘୁଞ୍ଚାଇ ଦେଇଛି। ଓଏସଏସଏସସି (OSSSC) ଦ୍ଵାରା ଆୟୋଜିତ ଆରଆଇ-ଅମିନ ପରୀକ୍ଷା ସହିତ ତାରିଖ ସଂଘର୍ଷ ହେଉଥିବାରୁ ବୋର୍ଡ ପକ୍ଷରୁ ଏହି ନିଷ୍ପତ୍ତି ନିଆଯାଇଛି। ଉଲ୍ଲେଖଯୋଗ୍ୟ ଯେ, ପ୍ରଥମେ ଏହି ପରୀକ୍ଷା ଜୁନ ୨୧ ରେ ହେବାର ଥିଲା, ମାତ୍ର ନିଟ୍ (NEET) ପରୀକ୍ଷା ଯୋଗୁଁ ଏହାକୁ ଜୁନ ୨୮ କୁ ଘୁଞ୍ଚାଯାଇଥିଲା। ଏବେ ଦ୍ୱିତୀୟ ଥର ପାଇଁ ଏହାର ସୂଚୀ ବଦଳିଛି। ଏହି ବର୍ଷ ଓଟିଇଟି ପାଇଁ ମୋଟ ୯୭,୧୫୧ ଜଣ ପ୍ରାର୍ଥୀ ଆବେଦନ କରିଛନ୍ତି, ଯେଉଁଥିରେ ୧୩,୫୪୪ ଜଣ କାର୍ଯ୍ୟରତ ଶିକ୍ଷକ-ଶିକ୍ଷୟିତ୍ରୀ ମଧ୍ୟ ସାମିଲ ଅଛନ୍ତି। ପରିସଂଖ୍ୟାନ ଅନୁଯାୟୀ, ପେପର-୧ ପାଇଁ ୨୮,୮୨୧ ଜଣ ଏବଂ ପେପର-୨ ପାଇଁ ସର୍ବାଧିକ ୬୮,୩୩୦ ଜଣ ଆବେଦନକାରୀ ରହିଛନ୍ତି। ରାଜ୍ୟର ୩୧୧ଟି ସ୍ୱତନ୍ତ୍ର କେନ୍ଦ୍ରରେ ଏହି ପରୀକ୍ଷା ଅନୁଷ୍ଠିତ ହେବ।ଜୁଲାଇ ୫ ତାରିଖ ରବିବାର ଦିନ ଦୁଇଟି ପାଳିରେ ପରୀକ୍ଷା ପ୍ରକ୍ରିୟା ଶେଷ ହେବ। ପ୍ରଥମ ପାଳିରେ ପେପର-୧ ପରୀକ୍ଷା ସକାଳ ୯ଟାରୁ ଆରମ୍ଭ ହୋଇ ୧୧ଟା ୩୦ ମିନିଟ ପର୍ଯ୍ୟନ୍ତ ଚାଲିବ। ଏହା ପରେ ଦ୍ୱିତୀୟ ପାଳିରେ ପେପର-୨ ପରୀକ୍ଷା ଅପରାହ୍ନ ୨ଟାରୁ ସନ୍ଧ୍ୟା ୪ଟା ୩୦ ମିନିଟ ପର୍ଯ୍ୟନ୍ତ ଅନୁଷ୍ଠିତ ହେବ। ପରୀକ୍ଷାକୁ ସ୍ୱଚ୍ଛ ଓ ଶୃଙ୍ଖଳିତ କରିବା ପାଇଁ ବୋର୍ଡ ଏବଂ ରାଜ୍ୟ ସରକାରଙ୍କ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ସମସ୍ତ ପରୀକ୍ଷାର୍ଥୀଙ୍କୁ ନିର୍ଦ୍ଧାରିତ ସମୟ ପୂର୍ବରୁ କେନ୍ଦ୍ରରେ ପହଞ୍ଚିବା ସହ ବୋର୍ଡର ନିୟମାବଳୀ କଡ଼ାକଡ଼ି ଭାବେ ପାଳନ କରିବାକୁ ନିର୍ଦ୍ଦେଶ ଦିଆଯାଇଛି।
