ଭୁବନେଶ୍ୱର, ୧୩/୦୪/୨୦୨୬: ସଂସଦର ଉଚ୍ଚ ସଦନ ଅର୍ଥାତ୍ ରାଜ୍ୟସଭାରେ ବିଜୁ ଜନତା ଦଳ ନିଜର ନୂଆ ରଣନୀତି ପ୍ରସ୍ତୁତ କରିଛି। ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ରାଜ୍ୟସଭା ସାଂସଦ ମାନସ ମଙ୍ଗରାଜଙ୍କୁ ଦଳର ସଂସଦୀୟ ଦଳ ନେତା ଭାବେ ନୂଆ ଦାୟିତ୍ୱ ଅର୍ପଣ କରାଯାଇଛି। ପୂର୍ବରୁ ଏହି ପଦବୀରେ ଥିବା ଡକ୍ଟର ସସ୍ମିତ ପାତ୍ର ନିକଟରେ ଇସ୍ତଫା ଦେବା ପରେ ଶ୍ରୀ ମଙ୍ଗରାଜଙ୍କୁ ଏହି ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିଛି।
ମାନସ ମଙ୍ଗରାଜଙ୍କ ସହିତ ସାଂସଦ ସୁଲତା ଦେଓଙ୍କୁ ମଧ୍ୟ ଦଳ ପକ୍ଷରୁ ବଡ଼ ଦାୟିତ୍ୱ ଦିଆଯାଇଛି। ଶ୍ରୀମତୀ ଦେଓଙ୍କୁ ରାଜ୍ୟସଭାରେ ବିଜେଡିର ମୁଖ୍ୟ ସଚେତକ ଭାବେ ନିଯୁକ୍ତ କରାଯାଇଛି। ସଂସଦରେ ଦଳୀୟ ଶୃଙ୍ଖଳା ରକ୍ଷା କରିବା ଏବଂ ବିଭିନ୍ନ ବିଲ୍ ଉପରେ ଦଳର ଆଭିମୁଖ୍ୟ ସ୍ପଷ୍ଟ କରିବାରେ ତାଙ୍କର ପ୍ରମୁଖ ଭୂମିକା ରହିବ।
ସୂଚନାଯୋଗ୍ୟ ଯେ, ସସ୍ମିତ ପାତ୍ର ବ୍ୟକ୍ତିଗତ କାରଣ ଦର୍ଶାଇ ସଂସଦୀୟ ଦଳ ନେତା ପଦରୁ ଇସ୍ତଫା ଦେଇଥିଲେ। ରାଜ୍ୟରେ ବିଜେଡି ଏବେ ବିରୋଧୀ ଦଳରେ ଥିବା ବେଳେ ରାଜ୍ୟସଭାରେ ଦଳର ସ୍ୱରକୁ ଆହୁରି ଶାଣିତ କରିବା ପାଇଁ ଏହି ଦୁଇ ଅଭିଜ୍ଞ ନେତାଙ୍କୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇଛି ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି।
