ଭୁବନେଶ୍ବର: ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନା ଅନ୍ତର୍ଗତ ଗେଙ୍ଗୁଟି ନଦୀ ବାଲିଘାଟରେ ଏକ ଅଭାବନୀୟ ଘଟଣା ଘଟିଯାଇଛି। ନଦୀକୁ ଗାଧୋଇବାକୁ ଯାଇ ଦମ୍ପତି ନିଖୋଜ ହୋଇଯାଇଛନ୍ତି। ନିଖୋଜ ଦମ୍ପତି ସ୍ଥାନୀୟ ବାଲିକୁଦା ଗ୍ରାମର ସୁଧାକର ଓଝା ଓ ତାଙ୍କ ସ୍ତ୍ରୀ ସୁଲୋଚନା ଓଝା ବୋଲି ଚିହ୍ନଟ ହୋଇଛନ୍ତି। ସୂଚନାଯୋଗ୍ୟ, ସୁଧାକର ଓ ସୁଲୋଚନା ଗେଙ୍ଗୁଟି ନଦୀକୁ ଗାଧୋଇବା ପାଇଁ ଯାଇଥିଲେ। ମାତ୍ର ବହୁ ସମୟ ବିତିଯିବା ପରେ ମଧ୍ୟ ସେମାନେ ଘରକୁ ନଫେରିବାରୁ ପରିବାର ଲୋକେ ବ୍ୟସ୍ତ ହୋଇ ଖୋଜାଖୋଜି ଆରମ୍ଭ କରିଥିଲେ। ନଦୀକୂଳରେ ସେମାନଙ୍କର ବାଲ୍ଟି, ଲୁଗାପଟା ଓ ଚପଲ ପଡ଼ିଥିବା ଦେଖିବାକୁ ମିଳିଥିଲା, ଯାହାଫଳରେ ଗାଧୋଉଥିବା ସମୟରେ ଗଭୀର ପାଣିରେ ବୁଡ଼ିଯାଇଥିବା ସନ୍ଦେହ କରାଯାଉଛି। ଖବର ପାଇ ବାଲିଚନ୍ଦ୍ରପୁର ପୋଲିସ ଏବଂ ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ନଦୀରେ ବ୍ୟାପକ ଖୋଜାଖୋଜି ଜାରି ରଖିଛନ୍ତି।
