ନୂଆଦିଲ୍ଲୀ: ଦେଶର ବିଭିନ୍ନ ଅଞ୍ଚଳରେ ଆସନ୍ତା ୫ ଦିନ ପର୍ଯ୍ୟନ୍ତ ମୌସୁମୀ ବର୍ଷା ସକ୍ରିୟ ରହିବ। ଭାରତୀୟ ପାଣିପାଗ ବିଭାଗ (IMD)ର ପୂର୍ବାନୁମାନ ଅନୁଯାୟୀ, ଅଗଷ୍ଟ ୧୧ ତାରିଖ ପର୍ଯ୍ୟନ୍ତ ଓଡ଼ିଶା, ଉତ୍ତରାଖଣ୍ଡ, କେରଳ ଓ ଆସାମ ସମେତ ଏକାଧିକ ରାଜ୍ୟରେ ବିଜୁଳି, ଘଡ଼ଘଡ଼ି ସହ ବ୍ୟାପକ ବର୍ଷା ଏବଂ କେତେକ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ। IMD ବୈଜ୍ଞାନିକ ନରେଶ କୁମାରଙ୍କ ସୂଚନା ଅନୁସାରେ, ପଞ୍ଜାବରୁ ଉତ୍ତର-ପୂର୍ବ ବଙ୍ଗୋପସାଗର ପର୍ଯ୍ୟନ୍ତ ବିସ୍ତୃତ ସକ୍ରିୟ ମୌସୁମୀ ଅକ୍ଷରେଖା ସହ ଉତ୍ତର, ପୂର୍ବ ଓ ଦକ୍ଷିଣ ଭାରତରେ ସୃଷ୍ଟି ହୋଇଥିବା ଏକାଧିକ ଉପରିଭାଗ ଘୂର୍ଣ୍ଣିବଳୟ ଏବଂ ପଶ୍ଚିମ ହିମାଳୟ ଅଞ୍ଚଳରେ ସକ୍ରିୟ ପଶ୍ଚିମା ଝଡ଼ ପ୍ରଭାବରେ ଏହି ପାଣିପାଗ ସ୍ଥିତି ସୃଷ୍ଟି ହୋଇଛି।
