ଭୁବନେଶ୍ୱର, ୨୪ ମାର୍ଚ୍ଚ ୨୦୨୬: ଓଡ଼ିଶାର ପ୍ରତିଟି ପରିବାରକୁ ସ୍ୱଚ୍ଛ ପାନୀୟ ଜଳ ଯୋଗାଇଦେବା ଲକ୍ଷ୍ୟରେ ଆଜି ଏକ ଐତିହାସିକ ପଦକ୍ଷେପ ନିଆଯାଇଛି। ରାଜ୍ୟରେ ‘ଜଳ ଜୀବନ ମିଶନ 2.0’ର ସଫଳ କାର୍ଯ୍ୟକାରିତା ପାଇଁ ନୂଆଦିଲ୍ଲୀ ଠାରେ କେନ୍ଦ୍ର ଜଳ ଶକ୍ତି ମନ୍ତ୍ରାଳୟ ଏବଂ ଓଡ଼ିଶା ସରକାରଙ୍କ ମଧ୍ୟରେ ଏକ ବୁଝାମଣା ପତ୍ର (MoU) ସ୍ୱାକ୍ଷର ହୋଇଛି। ଆଭାସୀ ମାଧ୍ୟମରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଲୋକସେବା ଭବନରୁ ଯୋଗ ଦେଇଥିବା ବେଳେ କେନ୍ଦ୍ର ଜଳ ଶକ୍ତି ମନ୍ତ୍ରୀ ଶ୍ରୀ ସି.ଆର୍. ପାଟିଲ୍ ଏବଂ ରାଷ୍ଟ୍ର ମନ୍ତ୍ରୀ ଶ୍ରୀ ବି. ସୋମନ୍ନା ନୂଆଦିଲ୍ଲୀରୁ ଉପସ୍ଥିତ ଥିଲେ। ଏହି ମିଶନକୁ ୨୦୨୮ ପର୍ଯ୍ୟନ୍ତ ସମ୍ପ୍ରସାରଣ କରାଯାଇଛି, ଯାହା ‘ହର ଘର ଜଳ’ ଲକ୍ଷ୍ୟ ପୂରଣ ଦିଗରେ ଏକ ମହତ୍ୱପୂର୍ଣ୍ଣ ମାଇଲଖୁଣ୍ଟ ସାବ୍ୟସ୍ତ ହେବ।
ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ମାଝୀ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ଯୋଗୁଁ ଦେଶର ୭୭.୩ ପ୍ରତିଶତ ପରିବାରକୁ ଟ୍ୟାପ୍ ସଂଯୋଗ ମିଳିସାରିଛି ଏବଂ ଓଡ଼ିଶା ପାଇଁ ଏକ ସ୍ପଷ୍ଟ ରୋଡମ୍ୟାପ୍ ପ୍ରସ୍ତୁତ କରାଯାଇଛି। ରାଜ୍ୟରେ ପ୍ରତ୍ୟେକ ବ୍ୟକ୍ତିଙ୍କ ପାଇଁ ଦୈନିକ ୭୦ ଲିଟର ପାନୀୟ ଜଳର ବ୍ୟବସ୍ଥା କରାଯାଇଛି। ଏହି ଯୋଜନାରେ ଡିଜିଟାଲ୍ ମନିଟରିଂ, ‘ସୁଜଳମ୍ ଭାରତ’ ପ୍ଲାଟଫର୍ମ ଏବଂ ‘ବସୁଧା ହେଲ୍ପଲାଇନ୍’ ଭଳି ସୁବିଧା ଜରିଆରେ ସେବାକୁ ଅଧିକ ଶକ୍ତିଶାଳୀ କରାଯାଇଛି। ବିଶେଷ କରି ଗ୍ରାମାଞ୍ଚଳରେ ଜଳ ପରିଚାଳନା ପାଇଁ ଜନସାଧାରଣଙ୍କ ଭାଗିଦାରୀ ଏବଂ ଡିଜିଟାଲ୍ ଗ୍ରୀଭାନ୍ସ ପ୍ଲାଟଫର୍ମ ଉପରେ ଗୁରୁତ୍ୱ ଦିଆଯାଉଛି। ଓଡ଼ିଶାର ୩୦ଟି ଜିଲ୍ଲାରୁ ୨୫ଟିରେ ‘ଜଳ ଅର୍ପଣ ଦିବସ’ ସଫଳତାର ସହ ପାଳନ କରାଯାଇଛି।
କେନ୍ଦ୍ର ମନ୍ତ୍ରୀ ଶ୍ରୀ ପାଟିଲ୍ କହିଛନ୍ତି ଯେ, ଜଳ ଜୀବନ ମିଶନ 2.0 ବିଶେଷ କରି ମହିଳାମାନଙ୍କ ଜୀବନରେ ବଡ଼ ସୁଧାର ଆଣିବ, କାରଣ ସେମାନଙ୍କୁ ଆଉ ପାଣି ପାଇଁ ଦୂରକୁ ଯିବାକୁ ପଡ଼ିବ ନାହିଁ। ଓଡ଼ିଶାରେ ଜଳ ଶକ୍ତି ଅଭିଯାନ ଏବେ ଏକ ଜନଆନ୍ଦୋଳନର ରୂପ ନେଇଛି, ଯାହା ଅଧୀନରେ ୨.୨୧ ଲକ୍ଷ ଜଳ ସଂରକ୍ଷଣ ଷ୍ଟ୍ରକ୍ଚର ଏବଂ ୪୩ ହଜାରରୁ ଅଧିକ ଜଳାଶୟର ପୁନରୁଦ୍ଧାର କରାଯାଇଛି। ଏହି କାର୍ଯ୍ୟକ୍ରମରେ ପଞ୍ଚାୟତିରାଜ ମନ୍ତ୍ରୀ ଶ୍ରୀ ରବି ନାରାୟଣ ନାୟକ, ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗଙ୍କ ସମେତ ଅନେକ ବରିଷ୍ଠ ପଦାଧିକାରୀ ଉପସ୍ଥିତ ଥିଲେ। ଏହି ମିଶନ ଜରିଆରେ ଓଡ଼ିଶାର ଜଳ ଅଭାବୀ ଅଞ୍ଚଳରେ ପାଣିର ଉପଲବ୍ଧତା ସୁନିଶ୍ଚିତ ହୋଇପାରିବ।
