ଭୁବନେଶ୍ୱର, ୦୧/୦୫/୨୦୨୬: ରାଜ୍ୟରେ ଗତ କିଛି ଦିନ ଧରି ଜାରି ରହିଥିବା ଅସହ୍ୟ ତାତି ଓ ଗୁଳୁଗୁଳିରୁ ଶେଷରେ ଲୋକଙ୍କୁ ଆଶ୍ୱସ୍ତି ମିଳିଛି। କାଳବୈଶାଖୀ ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ବର୍ଷା ହୋଇଥିବାରୁ ତାପମାତ୍ରାରେ ଉଲ୍ଲେଖନୀୟ ହ୍ରାସ ଘଟିଛି। ଶୁକ୍ରବାର ଅପରାହ୍ନ ୨ଟା ୩୦ ସୁଦ୍ଧା ମିଳିଥିବା ସୂଚନା ଅନୁଯାୟୀ, ରାଜ୍ୟର କୌଣସି ଗୋଟିଏ ହେଲେ ସହରରେ ପାରଦ ୪୦ ଡିଗ୍ରୀ ସେଲସିୟସ୍ ଅତିକ୍ରମ କରିନାହିଁ। ଏହି ପରିବର୍ତ୍ତିତ ପାଗ ଯୋଗୁଁ ଦୀର୍ଘ ଦିନର ପ୍ରଚଣ୍ଡ ରୌଦ୍ରତାପରୁ ଜନଜୀବନ ସାମାନ୍ୟ ଶାନ୍ତ ପଡ଼ିଛି।
ରାଜ୍ୟର ସହରଗୁଡ଼ିକ ମଧ୍ୟରେ ୩୫ ଡିଗ୍ରୀ ତାପମାତ୍ରା ସହ ଇସ୍ପାତ ସହର ରାଉରକେଲା ଆଜି ସବୁଠାରୁ ଉତ୍ତପ୍ତ ସହର ଭାବେ ପରିଗଣିତ ହୋଇଛି। ଅନ୍ୟପଟେ ଉପକୂଳ ଓଡ଼ିଶାରେ ପାଗ ବେଶ୍ କୋହଲା ରହିଛି। ରାଜଧାନୀ ଭୁବନେଶ୍ୱରରେ ତାପମାତ୍ରା ୩୧.୬ ଡିଗ୍ରୀ ସେଲସିୟସ୍ ରେକର୍ଡ କରାଯାଇଥିବା ବେଳେ ବାଲେଶ୍ୱରରେ ଏହା ୩୧.୨ ଡିଗ୍ରୀ ରହିଛି। କାଳବୈଶାଖୀର ଏହି ପ୍ରଭାବ ଆଗାମୀ କିଛି ଦିନ ପର୍ଯ୍ୟନ୍ତ ରହିପାରେ ବୋଲି ଅନୁମାନ କରାଯାଉଛି, ଯାହା ଫଳରେ ଗ୍ରୀଷ୍ମ ପ୍ରବାହର ପ୍ରକୋପ କମ୍ ରହିବ।
