“କ୍ଷମତା ନୁହେଁ, ଜନସେବା ହେଉଛି ମୂଳ ଲକ୍ଷ୍ୟ।”ଅନ୍ତ୍ୟୋଦୟ, ଏକାତ୍ମ ମାନବ ଦର୍ଶନ ଏବଂ ସମାଜର ଶେଷ ଧାଡ଼ିରେ ଥିବା ବ୍ୟକ୍ତିଙ୍କ କଲ୍ୟାଣକୁ ଗୁରୁତ୍ୱ ଦେଇଥିବା ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ଜନ୍ମଜୟନ୍ତୀ ଅବସରରେ ରାଜ୍ୟ ବିଜେପି ପକ୍ଷରୁ ବିଭିନ୍ନ କାର୍ଯ୍ୟକ୍ରମ।ଭୁବନେଶ୍ୱରସ୍ଥିତ ରାଜ୍ୟ କାର୍ଯ୍ୟାଳୟରେ ପଣ୍ଡିତଜୀଙ୍କ ପ୍ରତିମୂର୍ତ୍ତି ଅନାବରଣ ସହ ମାଲ୍ୟାର୍ପଣ କରାଯାଇଛି। ଏହାପରେ ‘ସୁଶାସନରୁ ଅନ୍ତ୍ୟୋଦୟ’ ଶୀର୍ଷକ ରାଜ୍ୟସ୍ତରୀୟ ବିମର୍ଷ କର୍ମଶାଳା ଅନୁଷ୍ଠିତ ହୋଇଛି।
୧୯୧୬ ମସିହା ସେପ୍ଟେମ୍ବର ୨୫ରେ ଉତ୍ତରପ୍ରଦେଶର ମଥୁରା ଅଞ୍ଚଳରେ ଜନ୍ମଗ୍ରହଣ କରିଥିଲେ ପଣ୍ଡିତ ଦୀନଦୟାଲ ଉପାଧ୍ୟାୟ। ତାଙ୍କ ଚିନ୍ତାଧାରାର ମୁଖ୍ୟ ଆଧାର ଥିଲା ‘ଏକାତ୍ମ ମାନବ ଦର୍ଶନ’ ଓ ‘ଅନ୍ତ୍ୟୋଦୟ’। ସରକାରୀ ପ୍ରକାଶନଗୁଡ଼ିକରେ ମଧ୍ୟ ତାଙ୍କ ଚିନ୍ତାଧାରାକୁ ଅନ୍ତ୍ୟୋଦୟ ଓ ସମାଜର ଶେଷ ବ୍ୟକ୍ତିଙ୍କ ଉନ୍ନତି ସହ ଯୋଡ଼ି ଉଲ୍ଲେଖ କରାଯାଇଛି। ଏହି ଚିନ୍ତାଧାରାକୁ ଆଧାର କରି ବିଜେପି ନିଜର ସାଂଗଠନିକ ଓ ରାଜନୈତିକ ଦର୍ଶନକୁ ଆଗକୁ ନେଉଛି ବୋଲି ଦଳର ନେତାମାନେ କହିଛନ୍ତି।
ରାଜ୍ୟ ସଭାପତି ତଥା ରାଜ୍ୟସଭା ସାଂସଦ ମନମୋହନ ସାମଲ କହିଛନ୍ତି ଯେ, ଗରିବ, ଶୋଷିତ ଓ ବଞ୍ଚିତ ବର୍ଗଙ୍କ ନିକଟରେ ବିକାଶର ସୁଫଳ ପହଞ୍ଚାଇବା ହେଉଛି ଅନ୍ତ୍ୟୋଦୟର ମୂଳ ଲକ୍ଷ୍ୟ। ଏହି ଆଦର୍ଶକୁ ନେଇ ଓଡ଼ିଶାରେ ସଶକ୍ତ ଓ ସ୍ୱାବଲମ୍ବୀ ରାଜ୍ୟ ଗଠନ ଉପରେ ଗୁରୁତ୍ୱ ଦିଆଯାଉଛି ବୋଲି ସେ କହିଛନ୍ତି।କାର୍ଯ୍ୟକ୍ରମରେ ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ପ୍ରତିମୂର୍ତ୍ତି ଅନାବରଣ କରାଯାଇ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା।
ଏହାପରେ ରାଜ୍ୟର ବିଭିନ୍ନ ଅଞ୍ଚଳରୁ ଆସିଥିବା ଯୁବବର୍ଗଙ୍କୁ ନେଇ ‘ସୁଶାସନରୁ ଅନ୍ତ୍ୟୋଦୟ’ ଶୀର୍ଷକ କର୍ମଶାଳା ହୋଇଥିଲା। ପଣ୍ଡିତ ଦୀନଦୟାଲଙ୍କ ବିଚାର, ସୁଶାସନ, ଗରିବ କଲ୍ୟାଣ ଏବଂ ସମାଜର ଶେଷ ଧାଡ଼ିରେ ଥିବା ବ୍ୟକ୍ତିଙ୍କ ବିକାଶ ଭଳି ବିଷୟ ଉପରେ ବିଭିନ୍ନ ସତ୍ରରେ ଆଲୋଚନା ହୋଇଥିଲା। ଏହି ଅବସରରେ ପଣ୍ଡିତ ଦୀନଦୟାଲଙ୍କ ଜୀବନୀ ଓ ବିଚାରଧାରା ଉପରେ ଲେଖିଥିବା ଲେଖକ ଓ ସ୍ତମ୍ଭକାରମାନଙ୍କୁ ସମ୍ବର୍ଦ୍ଧିତ କରାଯାଇଥିଲା।ଅନ୍ତ୍ୟୋଦୟ ଓ ଏକାତ୍ମ ମାନବ ଦର୍ଶନକୁ ଆଧାର କରି ଗରିବ ଓ ବଞ୍ଚିତ ବର୍ଗଙ୍କ ଉନ୍ନତି ସହ ଏକ ସଶକ୍ତ ଓ ସ୍ୱାବଲମ୍ବୀ ଓଡ଼ିଶା ଗଠନର ସଂକଳ୍ପ ନେଇ ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ଜନ୍ମଜୟନ୍ତୀ ପାଳନ କରିଛି ରାଜ୍ୟ ବିଜେପି।
