ନୂତନ ଡିଜିଟାଲ ପେମେଣ୍ଟ ନିୟମ ରାଜନୈତିକ ହଇଚଇ ସୃଷ୍ଟି କରିଛି। ରାହୁଲ ଗାନ୍ଧୀ ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ ଏହି ନିଷ୍ପତ୍ତିକୁ ‘UPI ଟ୍ୟାକ୍ସ’ ବୋଲି ଅଭିହିତ କରି ଏହାକୁ ତୁରନ୍ତ ପ୍ରତ୍ୟାହାର କରିବାକୁ ଦାବି କରିଛନ୍ତି । ସେ ସୋସିଆଲ ମିଡିଆ ‘ଏକ୍ସ’ରେ ଭିଡିଓ ବାର୍ତ୍ତା ଜାରି କରି କେନ୍ଦ୍ର ସରକାରଙ୍କ ନିଷ୍ପତ୍ତିକୁ ସମାଲୋଚନା କରିଛନ୍ତି । ଅଭିଯୋଗ କରିଛନ୍ତି ଯେ ଏହି ନିଷ୍ପତ୍ତି ସିଧାସଳଖ ସାଧାରଣ ଲୋକଙ୍କ ପକେଟ ଉପରେ ବୋଝ ପକାଇବ।
ନୂଆ ନିୟମ ଅନୁଯାୟୀ, ଅକ୍ଟୋବର ୧୫, ୨୦୨୬ରୁ ୨,୦୦୦ ଟଙ୍କାରୁ ଅଧିକ କିଛି Person-to-Merchant (P2M) UPI କାରବାର ଉପରେ ୦.୪ ପ୍ରତିଶତ MDR ଲାଗୁ ହେବ। ୭୫ ହଜାର ଟଙ୍କା କିମ୍ବା ତା’ଠାରୁ ଅଧିକ କାରବାରରେ ଏହାର ସର୍ବାଧିକ ସୀମା ୩୦୦ ଟଙ୍କା ରହିବ । ତେବେ ଏହି ଶୁଳ୍କ ସିଧାସଳଖ ଗ୍ରାହକଙ୍କଠାରୁ ଆଦାୟ ହେବ ନାହିଁ। ସରକାରଙ୍କ ସ୍ପଷ୍ଟୀକରଣ ଅନୁସାରେ, MDR ବ୍ୟବସାୟୀଙ୍କ ପେମେଣ୍ଟ ଇକୋସିଷ୍ଟମ୍ ମଧ୍ୟରେ ଲାଗୁ ହେବ ଏବଂ ଏହା ସରକାର କିମ୍ବା NPCI ଦ୍ୱାରା ଟ୍ୟାକ୍ସ ଭାବେ ସଂଗ୍ରହ କରାଯିବ ନାହିଁ । Person-to-Person UPI କାରବାର ସମ୍ପୂର୍ଣ୍ଣ ମାଗଣା ରହିବ । ୨,୦୦୦ ଟଙ୍କା ପର୍ଯ୍ୟନ୍ତର P2M କାରବାର ମଧ୍ୟ ମାଗଣା ରହିବ । ସରକାର କହିଛି, ନୂଆ ବ୍ୟବସ୍ଥା UPI ଇକୋସିଷ୍ଟମ୍ର ଦୀର୍ଘକାଳୀନ ଆର୍ଥିକ ସ୍ଥାୟୀତ୍ୱ ପାଇଁ ଉଦ୍ଦିଷ୍ଟ । ସରକାରଙ୍କ ଅନୁସାରେ, ପ୍ରାୟ ୯୬ ପ୍ରତିଶତ P2M କାରବାର ଏହି ଚାର୍ଜରୁ ପ୍ରଭାବିତ ହେବ ନାହିଁ ।
ଅନ୍ୟପଟେ, ରାହୁଲ ଗାନ୍ଧୀ ଏହି ନୂଆ MDR ବ୍ୟବସ୍ଥାକୁ ନେଇ କେନ୍ଦ୍ର ସରକାରଙ୍କୁ ସମାଲୋଚନା କରିବା ସହ ନିଷ୍ପତ୍ତି ପ୍ରତ୍ୟାହାର ଦାବି କରିଛନ୍ତି । ବିରୋଧୀ ଦଳଗୁଡ଼ିକର ଆଶଙ୍କା ହେଉଛି, ବ୍ୟବସାୟୀଙ୍କ ଉପରେ ଅତିରିକ୍ତ ଖର୍ଚ୍ଚ ପଡ଼ିଲେ ତାହାର ପ୍ରଭାବ ପରୋକ୍ଷ ଭାବେ ଗ୍ରାହକଙ୍କ ଉପରେ ପଡ଼ିପାରେ । ତେବେ ସରକାର କହିଛି, MDR ଗ୍ରାହକଙ୍କ ଉପରେ ପାସ୍ କରାଯିବା ଉଚିତ୍ ନୁହେଁ ।
