ନୂଆଦିଲ୍ଲୀ: ଏକ ପୁରୁଣା ଚେକ୍-ବାଉନ୍ସ ମାମଲାରେ ବଲିଉଡ ଅଭିନେତା ରାଜପାଲ ଯାଦବଙ୍କୁ ସୁପ୍ରିମକୋର୍ଟରୁ ମଧ୍ୟବର୍ତ୍ତୀକାଳୀନ ଆଶ୍ୱସ୍ତି ମିଳିଛି। ତେବେ ଶୁଣାଣି ସମୟରେ କୋର୍ଟଙ୍କ ରୁଖ୍ ବେଶ୍ କଠୋର ରହିଥିଲା। ସୁପ୍ରିମକୋର୍ଟ ଅଭିନେତାଙ୍କୁ କଠୋର ଚେତାବନୀ ଦେଇ କହିଛନ୍ତି ଯେ, ସେ ଫିଲ୍ମରେ ବହୁତ ଭଲ ଅଭିନୟ କରନ୍ତି; ମାତ୍ର କୋର୍ଟ ସମ୍ମୁଖରେ ଏପରି ମନୋଭାବ ଗ୍ରହଣ ନ କରିବାକୁ ଆଶା କରାଯାଏ। ସୁପ୍ରିମକୋର୍ଟ ରାଜପାଲ ଯାଦବଙ୍କୁ ୨ କୋଟି ଟଙ୍କାର ଡିମାଣ୍ଡ ଡ୍ରାଫ୍ଟ ଜମା କରିବା ପାଇଁ ଦୁଇ ସପ୍ତାହର ସମୟ ଦେଇଛନ୍ତି। କୋର୍ଟ ଦୁଇଟି ନିର୍ଦ୍ଦେଶ ଜାରି କରିବା ସହ ସ୍ପଷ୍ଟ କରିଛନ୍ତି ଯେ, ଅଭିନେତାଙ୍କ ପାଇଁ ଟଙ୍କା ଜମା କରିବାର ଏହା ଶେଷ ସୁଯୋଗ। ଏହା ପରେ ଆଉ କୌଣସି ଅତିରିକ୍ତ ସମୟ କିମ୍ବା ଛାଡ଼ ଦିଆଯିବ ନାହିଁ।
