ଭୁବନେଶ୍ବର: ରାଜ୍ୟ କ୍ୟାବିନେଟ୍ଙ୍କ ନିଷ୍ପତ୍ତି ଅନୁଯାୟୀ ଓଡ଼ିଆ ଉଚ୍ଚାରଣ ସହ ସମନ୍ୱୟ ରଖି ସଂଶୋଧିତ ହୋଇଥିବା ବିଭିନ୍ନ ସ୍ଥାନନାମର ଇଂରାଜୀ ବନାନକୁ ସମସ୍ତ ସରକାରୀ କାର୍ଯ୍ୟାଳୟ ଓ ପ୍ରତିଷ୍ଠାନରେ ସମାନ ଭାବେ ବ୍ୟବହାର କରିବାକୁ ରାଜ୍ୟ ସରକାର କଡ଼ା ନିର୍ଦ୍ଦେଶ ଦେଇଛନ୍ତି। ଆସନ୍ତା ୭ ଦିନ (ଗୋଟିଏ ସପ୍ତାହ) ମଧ୍ୟରେ ଏହି ପ୍ରକ୍ରିୟା ଶେଷ କରି ଅନୁପାଳନ ରିପୋର୍ଟ ଦାଖଲ କରିବାକୁ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଡ. ଅରବିନ୍ଦ କୁମାର ପାଢ଼ୀ ସମସ୍ତ ଜିଲ୍ଲାପାଳଙ୍କୁ ଚିଠି ଲେଖି ଜଣାଇଛନ୍ତି। ଗତ ଜୁନ୍ ୨୨ ତାରିଖରେ ପ୍ରକାଶିତ ଗେଜେଟ୍ ବିଜ୍ଞପ୍ତି ଅନୁସାରେ ସରକାରୀ ସାଇନ୍ବୋର୍ଡ ଓ ନାମଫଳକଗୁଡ଼ିକରେ ସଂଶୋଧିତ ଇଂରାଜୀ ବନାନ ଲଗାଇବାକୁ ଗୋଟିଏ ମାସର ମହଲତ୍ ଦିଆଯାଇଥିଲା। ହେଲେ ଏବେ ବି କେତେକ ସରକାରୀ କାର୍ଯ୍ୟାଳୟରେ ‘Jeypore’ ଓ ‘Soro’ ପରି ପୁରୁଣା ଇଂରାଜୀ ବନାନ ବ୍ୟବହାର ହେଉଥିବା ସରକାରଙ୍କ ନଜରକୁ ଆସିଛି। ଏହାଦ୍ୱାରା ସରକାରୀ ନଥିପତ୍ର ଓ ନାମକରଣରେ ଅସଙ୍ଗତି ସୃଷ୍ଟି ହେଉଥିବାରୁ ତୁରନ୍ତ ଏଗୁଡ଼ିକୁ ହଟାଇ ‘Jayapur’, ‘Sora’, ‘KATAKA’, ‘Anugola’, ‘Baleshwar’ ଓ ‘Kendrapada’ ଭଳି ସରକାରୀ ଅନୁମୋଦିତ ବନାନ ବ୍ୟବହାର କରିବାକୁ କୁହାଯାଇଛି। ଜିଲ୍ଲାପାଳମାନେ ନିଜ ନିଜ ଜିଲ୍ଲାର ସମସ୍ତ ସରକାରୀ ଦପ୍ତରର ସାଇନ୍ବୋର୍ଡ ସମୀକ୍ଷା କରିବା ସହ ବେସରକାରୀ ଓ ସେମି-ଗଭର୍ଣ୍ଣମେଣ୍ଟ ଅନୁଷ୍ଠାନଗୁଡ଼ିକୁ ମଧ୍ୟ ନିର୍ଦ୍ଧାରିତ ସମୟସୀମା (୬ ମାସ) ମଧ୍ୟରେ ଏହି ସଂଶୋଧିତ ବନାନ ଗ୍ରହଣ କରିବାକୁ ଉତ୍ସାହିତ କରିବେ। ଏହି କାର୍ଯ୍ୟକୁ ସର୍ବୋଚ୍ଚ ପ୍ରାଥମିକତା ଦେଇ ଏକ ସପ୍ତାହ ମଧ୍ୟରେ ଚୂଡ଼ାନ୍ତ ରିପୋର୍ଟ ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି।
