ଭୁବନେଶ୍ୱର, ୨୫ ମାର୍ଚ୍ଚ ୨୦୨୬: ଓଡ଼ିଶାର କୃଷକମାନଙ୍କୁ ସେମାନଙ୍କ ଉତ୍ପାଦ ପାଇଁ ସୁନିଶ୍ଚିତ ବଜାର ଯୋଗାଇଦେବା ଏବଂ ମଧ୍ୟସ୍ଥିମାନଙ୍କ ପ୍ରାଦୁର୍ଭାବ ରୋକିବା ପାଇଁ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଅଧୀନସ୍ଥ ‘ଓରମାସ’ (ORMAS) ଏକ ଅଭିନବ ପ୍ରୟାସ ଆରମ୍ଭ କରିଛି। ଏହି ପଦକ୍ଷେପ ଅଧୀନରେ ରାଜ୍ୟର ବିଭିନ୍ନ ଜିଲ୍ଲାରୁ ସ୍ୱୟଂ ସହାୟକ ଗୋଷ୍ଠୀ (SHG) ଏବଂ କୃଷକ ଉତ୍ପାଦକ ସଂଗଠନ (FPO) ମାଧ୍ୟମରେ ସିଧାସଳଖ ଟମାଟୋ ସଂଗ୍ରହ କରାଯାଉଛି। ଏହି କାର୍ଯ୍ୟକ୍ରମରେ ପ୍ରତିଷ୍ଠିତ କମ୍ପାନୀ ‘ଭାରତ ମସଲା’ ଓରମାସ ସହିତ ମିଳିତ ଭାବେ କାର୍ଯ୍ୟ କରି କୃଷକମାନଙ୍କଠାରୁ ନ୍ୟାୟସଙ୍ଗତ ମୂଲ୍ୟରେ ଟମାଟୋ କ୍ରୟ କରୁଛି।
୨୪ ମାର୍ଚ୍ଚ ୨୦୨୬ ସୁଦ୍ଧା ମିଳିଥିବା ତଥ୍ୟ ଅନୁଯାୟୀ, ଗଞ୍ଜାମ, କଟକ, ଅନୁଗୁଳ, ଝାରସୁଗୁଡ଼ା ଏବଂ ଜଗତସିଂହପୁର ଜିଲ୍ଲାରୁ ମୋଟ ୧୨୮.୩୦ ମେଟ୍ରିକ ଟନ ଟମାଟୋ ସଂଗ୍ରହ କରାଯାଇଛି। ଏଥିମଧ୍ୟରୁ କଟକ ଜିଲ୍ଲାରୁ ସର୍ବାଧିକ ୫୩ ମେଟ୍ରିକ ଟନ ଟମାଟୋ ସଂଗ୍ରହ ହୋଇଥିବା ବେଳେ ଗଞ୍ଜାମରୁ ୩୩.୮୦, ଅନୁଗୁଳରୁ ୨୦, ଝାରସୁଗୁଡ଼ାରୁ ୧୮ ଏବଂ ଜଗତସିଂହପୁର ଜିଲ୍ଲାରୁ ୩.୫୦ ମେଟ୍ରିକ ଟନ ଟମାଟୋ ଭାରତ ମସଲାକୁ ବିକ୍ରୟ କରାଯାଇଛି। ଏହି ବଜାର ସଂଯୋଗୀକରଣ ଫଳରେ କୃଷକମାନେ ଆଉ ଦଲାଲ ବା ମଧ୍ୟସ୍ଥିଙ୍କ ଉପରେ ନିର୍ଭର ନକରି ସିଧାସଳଖ ଲାଭାନ୍ୱିତ ହୋଇପାରୁଛନ୍ତି।
ଓରମାସର ଏହି ଉଦ୍ୟମ ଗ୍ରାମୀଣ ଅର୍ଥନୀତିକୁ ସୁଦୃଢ଼ କରିବା ସହ ଚାଷୀମାନଙ୍କୁ ସେମାନଙ୍କ ପରିଶ୍ରମର ଉଚିତ୍ ମୂଲ୍ୟ ଦେବାରେ ସହାୟକ ହେଉଛି। କୃଷକମାନେ ସେମାନଙ୍କ ଉତ୍ପାଦ ପାଇଁ ଏକ ସ୍ଥାୟୀ ବଜାର ପାଇଥିବାରୁ ଏବେ ସେମାନଙ୍କ ମଧ୍ୟରେ ଉତ୍ସାହ ଦେଖାଦେଇଛି। ଆଗାମୀ ଦିନରେ ଅନ୍ୟ କୃଷିଜାତ ଦ୍ରବ୍ୟ ପାଇଁ ମଧ୍ୟ ଏଭଳି ସୁନିଶ୍ଚିତ ବିପଣନ ବ୍ୟବସ୍ଥା କରାଗଲେ ଓଡ଼ିଶାର କୃଷି କ୍ଷେତ୍ରରେ ଏକ ବଡ଼ ପରିବର୍ତ୍ତନ ଆସିବ ବୋଲି ଆଶା କରାଯାଉଛି।
