ଭୁବନେଶ୍ୱର, ୨୦ ମାର୍ଚ୍ଚ ୨୦୨୬: ରାଜ୍ୟସଭା ନିର୍ବାଚନରେ କ୍ରସ୍ ଭୋଟିଂକୁ ନେଇ କାରଣ ଦର୍ଶାଅ ନୋଟିସର ଉତ୍ତର ରଖିଥିବା ବିଜେଡିର ୬ ବିଧାୟକଙ୍କୁ କଡ଼ା ଭାଷାରେ ସମାଲୋଚନା କରିଛନ୍ତି ମୁଖ୍ୟ ସଚେତକ ପ୍ରମିଳା ମଲ୍ଲିକ। ବିଧାୟକମାନଙ୍କ ଜବାବ ଉପରେ ପ୍ରତିକ୍ରିୟା ରଖି ସେ କହିଛନ୍ତି ଯେ, ଏହି ସବୁ ଉତ୍ତର କୌଣସି ଏକ ନିର୍ଦ୍ଦିଷ୍ଟ ଅଫିସରେ ବସି ଟାଇପ୍ କରାଯାଇଛି ଏବଂ ବିଧାୟକମାନେ କେବଳ ସେଥିରେ ଦସ୍ତଖତ କରିଛନ୍ତି। ବିଧାୟକମାନେ ନିଜ ଜବାବରେ ସତ କଥା ଲେଖୁନାହାନ୍ତି କିମ୍ବା କାହିଁକି କ୍ରସ୍ ଭୋଟିଂ କଲେ ସେ ନେଇ ସ୍ପଷ୍ଟୀକରଣ ଦେଉନାହାନ୍ତି ବୋଲି ସେ ଅଭିଯୋଗ କରିଛନ୍ତି। ଏଥିସହ ସେମାନେ ଆଇନର ଆଶ୍ରୟ ନେବାକୁ ଯେଉଁ ଚେତାବନୀ ଦେଇଛନ୍ତି, ତାହା ଉପରେ ପ୍ରତିକ୍ରିୟା ଦେଇ ପ୍ରମିଳା କହିଛନ୍ତି ଯେ ଆଇନ କ’ଣ କେବଳ ସେମାନଙ୍କ ପାଇଁ? ସେମାନେ ଚାହିଁଲେ ନିଶ୍ଚିତ ଭାବେ ଆଇନର ଆଶ୍ରୟ ନେଇପାରନ୍ତି।
ପ୍ରମିଳା ମଲ୍ଲିକ ଆହୁରି ମଧ୍ୟ କହିଛନ୍ତି ଯେ, ବର୍ତ୍ତମାନ ଦଳ ଭିତରେ ଏକ ‘ଫିଲ୍ଟର’ ପ୍ରକ୍ରିୟା ଚାଲିଛି। ଦଳରୁ ସବୁ ଅଳିଆ ବାହାରିଗଲେ ବିଜେଡି ଆହୁରି ସ୍ୱଚ୍ଛ ଓ ମଜବୁତ ହେବ। ବିଧାୟକମାନେ ରାଜ୍ୟସଭା ନିର୍ବାଚନରେ ‘ହ୍ବିପ୍’ କାମ କରେ ନାହିଁ ବୋଲି ଯେଉଁ ଯୁକ୍ତି ବାଢ଼ିଛନ୍ତି ଏବଂ ମୁଖ୍ୟ ସଚେତକଙ୍କ ବିରୋଧରେ ଫୌଜଦାରୀ ମାମଲା କରିବାକୁ ଧମକ ଦେଇଛନ୍ତି, ତାହା ଦଳୀୟ ଶୃଙ୍ଖଳା ରକ୍ଷା କ୍ଷେତ୍ରରେ କୌଣସି ପ୍ରଭାବ ପକାଇବ ନାହିଁ ବୋଲି ସେ ସୂଚାଇଛନ୍ତି। ଦଳର ନିଷ୍ପତ୍ତି ବିରୋଧରେ ଯାଇଥିବା ନେତାମାନଙ୍କ ପ୍ରତି ଦଳ ଆଦୌ କୋହଳ ମନୋଭାବ ପୋଷଣ କରିବ ନାହିଁ ବୋଲି ତାଙ୍କ କଥାରୁ ସ୍ପଷ୍ଟ ହୋଇଛି।
ସୂଚନାଯୋଗ୍ୟ ଯେ, ବିଜେଡିର ୬ ବିଧାୟକ ନିଜ ଉତ୍ତରରେ ରାଜ୍ୟସଭା ନିର୍ବାଚନରେ ଦଳୀୟ ହ୍ବିପ୍ ବେଆଇନ ବୋଲି ଦର୍ଶାଇବା ସହ ନିର୍ବାଚନ କମିଶନ ଓ ସୁପ୍ରିମକୋର୍ଟଙ୍କ ରାୟର ଦ୍ରୋହୀ ଦେଇଥିଲେ। ଏଥିସହ ଭୋଟ୍ ଦେବା ପାଇଁ ଚାପ ପକାଇବା ଏକ ଦଣ୍ଡନୀୟ ଅପରାଧ ବୋଲି ସେମାନେ ଜବାବ ଦେଇଥିଲେ। ମାତ୍ର ପ୍ରମିଳା ମଲ୍ଲିକଙ୍କ ଏହି ସଦ୍ୟତମ ବୟାନ ପରେ ବିଜେଡି ଶିବିରରେ କାର୍ଯ୍ୟାନୁଷ୍ଠାନ ପ୍ରକ୍ରିୟା ଆହୁରି ତେଜିବା ସହ ରାଜନୈତିକ ଉଷ୍ଣତା ବଢ଼ିବାରେ ଲାଗିଛି।
