ଫାଲଗୁନ ମାସର ପୂର୍ଣ୍ଣିମା ତିଥି, ଚାରିଆଡ଼େ ଫଗୁର ଖେଳ ଆଉ ଆନନ୍ଦର ଉଲ୍ଲାସ। ହୋଲି – ଯାହାକୁ ଆମେ ରଙ୍ଗର ପର୍ବ ବୋଲି କହୁ। କିନ୍ତୁ ଆପଣ ଜାଣନ୍ତି କି, କାହିଁକି ଏହି ପର୍ବ ପାଳନ କରାଯାଏ? ଏହା ପଛରେ ରହିଛି କେଉଁ ପୌରାଣିକ କଥା? ଆସନ୍ତୁ ପଢିବା ଏହି ବିଶେଷ ରିପୋର୍ଟ
୧. ଅଧର୍ମ ଉପରେ ଧର୍ମର ବିଜୟ: ହୋଲି ପାଳନର ସବୁଠାରୁ ବଡ଼ କାରଣ ହେଉଛି ଅସୁର ରାଜା ହିରଣ୍ୟକଶ୍ୟପଙ୍କ ପୁତ୍ର ଭକ୍ତ ପ୍ରହ୍ଲାଦଙ୍କ କଥା ।ହିରଣ୍ୟକଶ୍ୟପ ନିଜକୁ ଭଗବାନ ମାନୁଥିଲେ, କିନ୍ତୁ ପୁଅ ପ୍ରହ୍ଲାଦ ଭଗବାନ ବିଷ୍ଣୁଙ୍କ ପରମ ଭକ୍ତ ଥିଲେ। ପ୍ରହ୍ଲାଦଙ୍କୁ ମାରିବା ପାଇଁ ହିରଣ୍ୟକଶ୍ୟପ ନିଜ ଭଉଣୀ ହୋଲିକାଙ୍କ ସାହାଯ୍ୟ ନେଇଥିଲେ। ହୋଲିକାଙ୍କ ପାଖରେ ନିଆଁରେ ନ ଜଳିବାର ବରଦାନ ଥିଲା। ଯେତେବେଳେ ହୋଲିକା ପ୍ରହ୍ଲାଦଙ୍କୁ ଧରି ନିଆଁରେ ବସିଲେ, ସେତେବେଳେ ପ୍ରହ୍ଲାଦଙ୍କ ଭକ୍ତି ଯୋଗୁଁ ସେ ରକ୍ଷା ପାଇଗଲେ, କିନ୍ତୁ ଅଧର୍ମର ପ୍ରତୀକ ହୋଲିକା ସେହି ନିଆଁରେ ପୋଡ଼ି ପାଉଁଶ ହୋଇଗଲେ ।ସେହିଦିନଠାରୁ ଅଧର୍ମ ଉପରେ ଧର୍ମର ଏବଂ ଅଶୁଭ ଉପରେ ଶୁଭର ବିଜୟକୁ ମନେ ପକାଇ ‘ହୋଲିକା ଦହନ’ ଓ ପରଦିନ ରଙ୍ଗର ପର୍ବ ପାଳନ କରାଯାଏ।
୨. ଶ୍ରୀକୃଷ୍ଣ ଓ ରାଧାଙ୍କ ପ୍ରେମ : ପୌରାଣିକ ମତ ଅନୁସାରେ, ଭଗବାନ ଶ୍ରୀକୃଷ୍ଣ ଏବଂ ରାଧାଙ୍କ ଅନାବିଳ ପ୍ରେମର ପ୍ରତୀକ ଭାବରେ ମଧ୍ୟ ହୋଲି ପାଳନ କରାଯାଏ। ବୃନ୍ଦାବନ ଓ ମଥୁରାରେ ଶ୍ରୀକୃଷ୍ଣ ଗୋପୀ ଓ ରାଧାଙ୍କ ସହ ରଙ୍ଗ ଖେଳୁଥିଲେ, ଯାହା ପରବର୍ତ୍ତୀ ସମୟରେ ଏକ ପରମ୍ପରାରେ ପରିଣତ ହେଲା।
୩. ଋତୁ ପରିବର୍ତ୍ତନର ଆଗମନ: ପ୍ରାକୃତିକ ଦୃଷ୍ଟିକୋଣରୁ ଦେଖିଲେ, ହୋଲି ଶୀତ ଋତୁର ବିଦାୟ ଏବଂ ବସନ୍ତ ଋତୁର ଆଗମନକୁ ସୂଚାଏ। ଏହି ସମୟରେ ଚାରିଆଡ଼େ ନୂଆ ଫୁଲ ଫୁଟେ ଏବଂ ପ୍ରକୃତି ରଙ୍ଗୀନ ଦେଖାଯାଏ। ସେଥିପାଇଁ ଲୋକମାନେ ନୂଆ ଅମଳର ଖୁସିରେ ରଙ୍ଗ ଖେଳି ଏହାକୁ ସେଲିବ୍ରେଟ୍ କରନ୍ତି।
୪. ଓଡ଼ିଶାରେ ଦୋଳ ପୂର୍ଣ୍ଣିମା : ଓଡ଼ିଶାରେ ହୋଲିକୁ ‘ଦୋଳ ପୂର୍ଣ୍ଣିମା’ ଭାବେ ଖୁବ୍ ଧୁମଧାମରେ ପାଳନ କରାଯାଏ। ଏହି ଦିନ ଦୋଳରେ ଠାକୁରଙ୍କୁ ବସାଇ ଗାଁ ଗାଁ ବୁଲାଯାଏ। ଫଗୁ ଦଶମୀଠାରୁ ଆରମ୍ଭ ହୋଇ ପଞ୍ଚୁଦୋଳ ଯାଏଁ ଏହି ଉତ୍ସବ ଚାଲେ।
ହୋଲି କେବଳ ରଙ୍ଗର ଖେଳ ନୁହେଁ, ଏହା ହେଉଛି ଭେଦଭାବ ଭୁଲି ପରସ୍ପରକୁ ଆପଣେଇବାର ପର୍ବ। ତେଣୁ ଚଳିତ ବର୍ଷ ମଧ୍ୟ ଆନନ୍ଦର ସହ ଏବଂ ସୁରକ୍ଷିତ ଭାବେ ହୋଲି ପାଳନ କରନ୍ତୁ।
